Блж. Матрона Московская

Месяца апреля в 19 день

Святыя праведныя Матроны Московския

На Велицей вечерни

Блажен муж: 1-й антифон.

На Господи, воззвах: стихиры праздника 3, глас 2.

Подобен: Егда от Древа:

Стих: Из глубины воззвах к Тебе Господи, Господи, услыши глас мой.

Радуются ученицы Христовы, от ангела глаголы слышаша, отонудуже Воскресение нас ради в мертвых вменившагося навыкают. Аще и прежде мироносицы гробу предсташа, и рыдающе о Христе, камень узревше внезапу отвален, егоже недоумевахуся преложению.

Стих: Да будут уши Твои, внемлюще гласу моления моего.

Непрестающую и божественную радость подающа, божественным и священным учеником явишася, ученицы мироносицы Христовы, исполнивша повеление Божественнаго ангела. Егоже ужасошася белоносныя одежды, глаголюща: пленен бысть ад всеспасительным Воскресением нас ради умершаго Царя.

Стих: Аще беззакония назриши Господи, Господи, кто постоит? Яко у Тебе очищение есть.

Струи от слезнаго источника, рыдание испустивша, божественныя Христовы ученицы, глаголы радостныя приношают ныне самовидцем благодати, возвещающе сим Слова востание, и яже из гроба радость. Темже вместо печали слышаху глас преславно, сим еже радуйтеся повелевающ.

И святыя на 5. Глас 6.

Подобен: Все отложше:

Стих: Имене ради Твоего, потерпех Тя Господи, потерпе душа моя в слово Твое, упова душа моя на Господа.

Богоблаженная мати Матроно, ты, дневнаго света не познавши, светом Невечерним озарилася еси и, со ангельскими лики водворяющися, прославляеши Святую Троицу, Юже моли непрестанно просветити ны, душевныма очима ослепленныя.

Стих: От стражи утренния до нощи, от стражи утренния, да уповает Израиль на Господа.

Боголюбивая старице Матроно, ты, от Господа дар прозрения приемши, сокровенная сердец человеческих ведала еси и, будущая, яко настоящая, прорицающи, заблуждшия ко Христу привела еси, Его же моли непрестанно спасти и просветити души наша.

Стих: Яко у Господа милость, и многое у Него избавление, и Той избавит Израиля от всех беззаконий его.

Вся, яже в мире сем, отринувши и изгнана бывши правды ради, странница на земли явилася еси, не имущи, где главу подклонити, Христу Спасителю нашему подобящися, блаженная мати Матроно, Царствия Небеснаго достигла еси, идеже несть болезнь, печаль, ни воздыхание, но со ангельскими лики водворение и жизнь безконечная.

Ины стихиры, глас 2.

Подобен: Егда от Древа:

Стих: Хвалите Господа вси языцы, похвалите Его вси людие.

Егда година лютая земли нашея приспе и жизнь верных власти безбожных предадеся, ты же, блаженная, по весем и градом скитающися, правую веру небоязненно и дерзновенно в людех утверждала еси во еже коемуждо, Бога взыскующему, ненаветну от сил вражиих быти и спасение улучити.

Стих: Яко утвердися милость Его на нас, и истина Господня пребывает во век.

Внегда умрети ми, к месту моего упокоения притецыте и о потребнем вам рцыте, аз же, яко жива сущи, потщуся Господа умоляти вся полезная вам даровати. Тако с любовию к тебе притекающим рекла еси, старице Матроно блаженная.

Слава, глас 6:

Днесь торжествует обитель Покрова Пресвятая Девы Богородицы, днесь радуется славнейший град Москва, и вси людие Российстии ликовствуют, яко даровася нам многоценное сокровище, честныя и многоцелебныя мощи твоя, старице Матроно, подают бо всем приходящим благодатную помощь: болезней исцеление и зол избавление, грехов прощение и душевное исправление. Темже благодарственно возвеличим Господа, прославляющаго святыя Своя и дарующаго тобою нам велию милость.

И ныне, праздника, глас 6:

Мироносицы жены, гроба Твоего достигша, и печати гробныя видевша, не обретша же пречистаго тела Твоего, рыдающя со тщанием приидоша, глаголющя: кто украде наше упование? кто взят мертва нага смирною помазана, Матери едино утешение? О како мертвыя ожививый умертвися? ад пленивый, како погребеся? Но воскресни Спасе самовластно, якоже рекл еси, тридневен, спасаяй души наша.

Вход. Прокимен дне. И чтения.

Бытия чтение [глава 18, 23–33]:

Приближився Авраам, рече: Погубиши ли праведнаго с нечестивым и будет праведник яко нечестивый? Аще будут пятдесят праведницы во граде, погубиши ли я? Не пощадиши ли всего места пятидесяти ради праведных, аще будут в нем? Никакоже Ты сотвориши по глаголу сему, еже убити праведника с нечестивым, и будет праведник яко нечестивый: никакоже, судяй всей земли, не сотвориши ли суда? Рече же Господь: аще будут в Содомех пятдесят праведницы во граде, оставлю весь град и все место их ради. И отвещав Авраам, рече: ныне начах глаголати ко Господу моему, аз же есмь земля и пепел: аще же умалятся пятдесят праведницы в четыредесять пять, погубиши ли четыредесяти пятих ради весь град? И рече: не погублю, аще обрящу тамо четыредесять пять. И приложи еще глаголати к Нему, и рече: Аще же обрящутся тамо четыредесять? И рече: не погублю ради четыредесяти. И рече: что, Господи, аще возглаголю? Аще же обрящется тамо тридесять? И рече: не погублю тридесятих ради. И рече: понеже имам глаголати ко Господу: аще же обрящутся тамо двадесять? И рече: не погублю, аще обрящутся тамо двадесять. И рече: что, Господи, аще возглаголю еще единою? Аще же обрящутся тамо десять? И рече: не погублю десятих ради. Отыде же Господь, яко преста глаголя ко Аврааму: и Авраам возвратися на место свое.

Пророчества Иоилева чтение [глава 2, 27–32]:

Рече Господь: уведите, яко посреде Израиля Аз есмь, и Аз Господь Бог ваш, и несть иного разве Мене: и не посрамятся ктому людие Мои во век. И будет по сих, и излию от Духа Моего на всяку плоть, и прорекут сынове ваши и дщери ваша, и старцы ваши сония узрят, и юноты ваши видения увидят: ибо на рабы Моя и на рабыни Моя во дни оны излию от Духа Моего и дам чудеса на небеси и на земли, кровь и огнь и курение дыма. Солнце обратится во тьму, и луна в кровь, прежде неже приити дню Господню великому и просвещенному. И будет, всяк, иже призовет имя Господне, спасется, яко в горе Сионе и во Иерусалиме будет спасаемый, якоже рече Господь, и благовествуемии, ихже Господь призва.

Премудрости Соломоновы чтение [глава 3, 1–9]:

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено: и, вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится в них Господь во веки. Надеющиися Нань уразумеют истину, и вернии в любви пребудут Ему. Яко благодать и милость в преподобных Его и посещение во избранных Его.

На литии стихиры, глас 7:

Времени лютому во отечестве нашем преспевшу, явишася мнози мученицы и исповедницы Христовы. Матрона же, старица блаженная, яко мученица безкровная, изгнания, скитания, уничижения, глад велий и жесток хлад претерпе и верность Господеви даже до часа смертнаго сохрани. Ныне, яко и прежде, нас научает богоугодное и праведное житие на земли являти и присно со Христом быти.

Приходящим к тебе, блаженная старице Матроно, дерзновенно возвещала еси: оскудение веры в людех многия беды несет, сего ради покаяние о гресех пред Господем подобает приносити и молитвы усердныя присно Тому творити, да не гневом Своим с лица земли истребит ны, но, да веру правую исповедующе, велелепно прославим на земли жизнь и щедроты нам Даровавшаго.

Слава, глас тойже:

Аще не стоит селение без праведника, не устоит земля Русская, оскудевши благочестием. Сице наставляла еси, праведная Матроно, люди заблуждшия, молящися усердно, да помилует Господь землю Русскую.

И ныне, праздника или Богородичен, глас тойже:

О Пресвятая Владычице Дево Богородице! Образ Твой, Взыскание погибших именуемый, тщанием Матроны праведныя написася и к пользе верных во храм Успения Твоего принесеся, да вси, взирающе нань, надежду твердую имут на Тя. Взыщи и наша души, Богомати, во мраце греховнем блуждающия, Твоим предстательством и молитвами Матроны блаженныя.

На стиховне стихиры, глас 5.

Подобен: Радуйся:

Радуйся, обитель Пречистыя Богородицы, имущи в себе сокровище неистощимое, честныя мощи блаженныя Матроны. Сия бо, света дневнаго не познавши, духовное же зрение от Бога приемши, даром прозрения и исцеления обогатися, научает ны, грешныя, како подобает спастися и получити в День судный от Господа прощение грехов и велию милость.

Стих: Господь решит окованныя, Господь умудряет слепцы.

Радуйся, избранный сосуде Святаго Духа, Небесная жительнице, немощным человеком помощнице и ко спасению путеводительнице, блаженная старице Матроно. Ты бо, прозирающи грядущая, яко настоящая, многия люди от греховнаго пути обратила еси и ко Христу привела еси. Испроси от Господа и нам, согрешающим, грехов оставление и велию милость.

Стих: Возведох очи мои в горы, отнюдуже приидет помощь моя.

Радуйся, на враги непобедимая воительнице, козни их всегда разрушающая и на жизненнем пути нас укрепляющая, кроткая обличительнице пороков наших. Предстоящи ныне престолу Царя небесных воинств, испроси нам, предобрая мати, память твою верно почитающим, прощение грехов и велию милость.

Слава, глас 6:

Приидите, прославим песненными хвалы и чистым сердцем блаженную матерь нашу Матрону, яже во дни безбожия и гонения непоколебимый столп благочестия и веры бысть, в немощнем телеси сущи, силу Божия благодати показа и многия люди окрест ея к Богу приведе, к покаянию и молитве о земли Российстей всех призва, и, тако сонм святых Московских исполнивши, явися присная о нас пред Богом печальница и теплая молитвенница.

И ныне, праздника, глас тойже:

Проси Иосиф тело Иисусово, и положи е в новом своем гробе: подобаше бо Ему из гроба, яко от чертога проити. Сокрушивый державу смерти, и отверзый врата райская человеком, Господи слава Тебе.

По Трисвятом, тропарь праздника, глас 2:

Благообразный Иосиф, с Древа снем пречистое тело Твое, плащаницею чистою обвив, и вонями во гробе нове покрыв положи: но тридневен воскресл еси Господи, подаяй мирови велию милость.

Слава, глас тойже:

Богом умудренную блаженную старицу Матрону, земли Тульския процветение и града Москвы преславное украшение, восхвалим днесь, вернии. Сия бо, света дневнаго не познавши, светом Христовым просветися и даром прозрения и исцеления обогатися. Пресельница же и странница на земли бывши, ныне в чертозех небесных престолу Божию предстоит и молится о душах наших.

И ныне, глас тойже:

Мироносицам женам, при гробе представ ангел вопияше: мира мертвым суть прилична, Христос же истления явися чуждь. Но возопийте: воскресе Господь, подаяй мирови велию милость.

    Rambler's Top100

Hosted by uCoz