 |
||
Седмица сырная: пятница | ||
| ||||||
|
|
Седмица сырная: пятница
См также:
В тойже четверток сырный, вечера:
От начала поклоны начинаем: и прочая вся служба, якоже и выше во вторник сырный указася.
На Господи воззвах, стихиры яко обычно.
Слава, и ныне, Богородичен: Свете тихий: И прокимен дне.
На стиховне самогласен дне, глас 2:
Господень Крест, неуклонно кланяющимся ему, всякия сласти брозда есть, и закон воздержания: ибо непрестанно взирающии на Пригвожденнаго на нем, распинают плоть со страстьми и похотьми. От нихже и мы быти потщимся, постом чистым присвоимся, человеколюбно нам присвоившемуся страстию и Своего безстрастия естество подавшему, имущему велию милость.
Повторяем сей со стихом: К Тебе возведох очи мои:
Стих: Помилуй нас Господи:
И мученичен: Земнаго наслаждения не возвелевше страстоносцы, небесных благих сподобишася, и ангелом сожители быша: Господи, молитвами их помилуй и спаси нас.
Слава, и ныне, Крестобогородичен.
Подобен: Егда от Древа:
Грозд всезрелый Чистая, Егоже невозделанно во утробе младоносила еси, на Древе яко узрела еси Сего висяща, рыдающи восклицала еси, и взывала еси: Чадо, сладость искапай, еюже пиянство всякое страстей отъемлется Благодетелю, Мене ради Тя рождшия, Божественными утешеньми, яко благоутробен.
Ныне отпущаеши: Богородице Дево: И прочее, творяще поклоны великия. Таже отпуст. Повечерие поем великое с поклоны, якоже во вторник указася.
В пяток сыроястный на Утрени,
по шестопсалмии поем Аллилуиа, на глас Троична гласа.
По 1-м стихословии седальны крестныя Осмогласника.
По 2-м стихословии седален Триоди, глас 7.
Подобен: Яко имуще:
Возвыси Церквей рог, честный Кресте, низложи еретическую гордыню силою твоею, и возвесели православных лики: сподоби предварити всем нам твое предвозвещение, и поклонитися тебе подножию Христову в тебе бо хвалимся, Древо благословенное.
Слава: тойже.
И ныне, Крестобогородичен:
Яко имущи милостивное на смирение наше, и зрящи на земныя удобообстоимыя люди, умилосердися благословенная Богородице, пребуди молящися, да не погибнем люте: молю яко Пречистая благопримирительнаго Бога, спастися душам нашим, Пресвятая Дево.
Таже чтем слово Великаго Василиа о посте, егоже начало: Вострубите в новомесячии трубою: Таже псалом 50.
И каноны Осмогласника, Минеи, и Триоди. В нихже песнех поем трипеснцы: оставляются таковыя песни Осмогласника, и Минеи: понеже двоирмосны суть трипеснцы.
Канон Триоди. Творение господина Иосифа. Глас 8:
Песнь 1:
Ирмос: Воду прошед:
Воздержания божественное время возсия всем, покаяния просвещение, тьму отъемлющее прегрешений: сие усердным сердцем приимем.
Се покаяния доброта души разширяет, пощения пригвождением: в сие трезвенно вшедше, и прегрешений вернии разрешение приимем.
Слава: Начала, власти, и херувими, и вся силы молитеся, время нам постное совершити в покаянии и всякой чистоте.
Богородичен: Святая Дево, верных заступление едина, молитву Твою споспешную, во время пощения всем подаждь, Богородицу Чистую Тя ведущим.
Ирмос: Воду прошед:
Песнь 3:
Ирмос: Небеснаго круга:
Всегубительных страстей душевных убежим подъятием поста, и умиления покажем плоды, первее грехами Бога благоутробнаго преогорчившии.
Свещи елеем благих деяний, вси ныне вжещи тщательно возусердствуим, яко да внидем с мудрыми девами во светлый чертог радующеся.
Богоглаголивии пророцы, боговиднии мученицы, и божественнии ученицы Спасовы, Того молите, добре начати и благоугодно скончати пощения поприще, вси помолимся.
Богородичен: Яко вину Тя всех благих Владычице, вси прилежно молим: еже совнити нам Твоим ходатайством в постный подвиг, и концу дароватися сего спасительному.
Ирмос: Небеснаго круга верхотворче Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Таже седален Минеи, и Крестобогородичен:
Песнь 4:
Ирмос: Услышах Господи смотрения:
Якоже утро приникши, ныне пощения благодать предлагает покаяния время нам, долгов тьму разрешающее.
Напитаим нищия, милость милостию восприемлюще, и пощения божественною водою душевныя скверны отмыем.
Слава: Небеснии ангели Благодавца умолите, умиленное наше покаяние, щедротами безмерными прияти.
Богородичен: Чистое очистилище согрешающих, святая Владычице, ходатайством Твоим раздери согрешений моих рукописание.
Ирмос: Услышах Господи, смотрения Твоего таинство, разумех дела Твоя, и прославих Твое Божество.
Песнь 5.
Ирмос: Вскую мя отринул еси от лица Твоего Свете незаходимый, и покрыла мя есть чуждая тьма окаяннаго? Но обрати мя, и к свету заповедей Твоих пути моя направи, молюся.
Настоящий день, начаток творяще жития чистоты, себе усердно к подвигом вернии уготовим, плотския болезни, и душевное благоплодие Владыце всех приносяще.
Моисеа пост, Божественнаго боговидения показа причастника: сего убо душе моя подражающи, пост приими, божественная восхождения в себе расположивши, яко да видиши Божию светлость.
Священных апостол, и священноименитых мученик мольбами, пощения время прейти нас сподоби Иисусе Щедрый, в покаянии, и всяком отложении греха, молимся.
Богородичен: В пощения дверь хотящии внити, молим Тя Божию дверь, совнити рабом Твоим Владычице, и разширити всяко помышления, и мысли, спасительная творити хотения.
Таже трипеснец господина Иосифа. Глас 6:
Песнь 5:
Ирмос: Божиим светом Твоим Блаже:
На Кресте руце пригвоздив, копием в ребра прободен, писание Человеколюбче падшаго Адама растерзал еси: темже Тя Жизнодавче, песньми славим.
Лестно змий лукавый страсти наложив ми душевныя, от рая изгна: Ты же длани на Кресте пригвоздив, к высоте нетления Спасе привлекл еси.
Поста божественное время, страсти очищающее душевныя, и телесныя омывающее язвы, прииде ныне, наста: вернии стецемся, и сие любомудренно приимем.
Время явися благое, в божественное души веселие, всякое лице облачающее: приидите, весело сие приимем, постом и молитвою предочищающеся.
Пост, слезы, молитву, обычай смиренный, нас ради смирившемуся принесем: яко да в день воздержания прощение подаст прегрешений наших.
Богородичен: Светолучными Твоими блистаньми, Владычице Благая мира, души моея тьму отжени, и нощь греха моего: да усердно пою, и блажу Тя.
Иный, глас 8:
Ирмос: Вскую мя отринул еси:
Кресту Твоему покланяюся Господи Человеколюбче, имже мя спасл еси, и пою страсти спасительныя и Божественныя Владыко, имиже страстей моих болезненных избавихся Слове, в жизнь преходя невредную.
Кресту надеющеся, лести противных отвращаемся, в нем водрузившеся, вернии познани быхом Богу, яко агнцы новорожденнии избраннии, и нелестное млеко испихом.
Слава, Троичен: Отца, и Слово вси, и Святаго Духа, славим во едином Естестве, познание светлое излагающе: покланяющеся обоим, и разделяюще Лицы, неслиянно, непреложно служаще.
Богородичен: Упование концем, радость рабом Твоим Ты еси Дево Чистая, чтущия любовию образ Твой, сохраняй Пречистая: и Твоими молитвами всех нас чуждаго свободи, яко премилосерднейшая.
Слава Тебе Боже наш, слава Тебе.
Правый путь Твой Господи, исправи всем рабом Твоим чтущим любовию, поста поприще утверди, и приведеньми на лучшее святаго Твоего Царствия нас сподоби.
Ирмос: Вскую мя отринул еси:
Песнь 6:
Ирмос: Очисти мя Спасе:
Постився Избавитель, настоящее время нам определи душевных скверн очистительное: теплым вернии приступим сердцем, яко да приимем прощение.
Мытарево Христе воздыхание прием, и блудницы от души плач приносимый, приими яко Человеколюбец наша мольбы, очищение нам даруя.
Слава: Проповедник и пророк, мученик и апостол Твоих, преподобных и святителей, и всех праведных Твоих Христе умоленьми, очищение прегрешений душам нашим низпосли.
Богородичен: Единая немощное человеческаго естества, божественным Твоим Рождеством Чистая утвердившая, поспешница мне явися, к постному входящу божественному поприщу.
Ирмос: Очисти мя Спасе, многа бо беззакониия моя, и из глубины зол возведи, молюся, к Тебе бо возопих, и услыши мя Боже спасения моего.
Кондак святаго. Аще святый не имать кондака, глаголем мученичен гласа.
Песнь 7:
Ирмос: Отроцы еврейстии в пещи:
Древле на колеснице огненной ношашеся Илиа, постом просветився: о душе! сего подражающи, плотския умертви похоти воздержанием.
Се время воздержания, являющее тебе свет спасения, не небрези душе, Богу долготерпящу, но усердно возопий: Благий ущедри мя.
Слава: Отроки оградивший пост, соблюде от огня неопалимы: Иисусе, тех молитвами, огня мя вечнаго избави многим Твоим милосердием.
Богородичен: Единая помощь человеков, помощница нам рабом Твоим буди, во время воздержания, яко да покаянием благоугождающе, приимем Небесное Царство.
Ирмос: Отроцы еврейстии в пещи попраша пламень дерзновенно, и на росу огнь преложиша, вопиюще: благословен еси Господи Боже во веки.
Песнь 8:
Ирмос: Седмерицею пещь халдейский мучитель богочестивым неистовно разжже: силою же лучшею спасены сия видев, Творцу и Избавителю вопияше: отроцы благословите, священницы воспойте, людие превозносите во вся веки.
Покаяния пещь усердно возжжем, и сласти в ней попалим вся телесныя: и огня будущаго искус не прияти, Богатаго в милости просим, вопиюще: священницы благословите, людие превозносите во вся веки.
Входное время поста нам будет всякаго греха отложения виновное, да не долу преклонимся, ниже уныло тецем, яко да в кратких и малых днех, многия скверны умилением сердца измыем, единаго Бога нашего поюще.
Ангельстии чини, мученик собрание, божественных апостол лик святый, преподобных собор, святителей же и пророков, Тебе молятся Благий Человеколюбче: покаяние истинное Твоим рабом подаждь, во время воздержания ныне вводимаго.
Богородичен: Богородительнице Всечистая, к Тебе прибегаем, ущедри нас благою Твоею молитвою, и даждь благопримирительна Твоего Сына и Господа всем нам, во время пощения ныне вводимаго, во спасение верных, Тебе песнословящих во вся веки.
Трипеснец:
Ирмос: За законы отеческия:
Наследие отеческое не сохранивше, греховным законом поработихомся: но простер длани Твоя на Кресте Божественнем, свободу всем даровал еси им: егоже Ти верою приводим во днех святых, помилуй ны Милостиве, Тебе превозносящия во вся веки.
Крестом Твоим разстояние, и градежа средостение разоривый, и мир в концах обновивый богатый мирствующим, даруй нам прейти Христе постоянием будущее пощение, Господа поющим непрестанно, и превозносящим во вся веки.
Поста благодать днесь солнечныя лучи всем предлагает, предочищающи мрак от греха: содержими страстьми различными, в радости прешедше приимем дар любомудренно, Господа пойте, вопиюще, и превозносите во вся веки.
Горько объем первозданный, в раи древле снедь безсловесно, отвержеся и осужден, от сладости изгнан бысть: но на Древе гвоздьми пригвожден, лукавное писание пригвоздил еси греха его. Темже Твое многое благоутробие воспеваем во вся веки.
Закон поста отринувше, в пропасти греха поползохомся, и поста востребовахом ныне вводимаго: егоже Щедре провождающим нам, благодать с небесе низпосли, и мир богатый: Господа пойте дела, и превозносите во вся веки.
Богородичен: Падающих исправление, грешников ходатаице, странных прохлаждение, скорбных утешение, Пресвятая Дево, души моея печаль разори Чистая, и утешение свыше от Бога подати ми молися поющу усердно, Тя превозносящу во вся веки.
Иный:
Ирмос: Ангели и небеса:
Пригвожденнаго плотию на Кресте Щедре, видящи Тя тварей естество пременяшеся: свет дне во тьму, движашеся земля, и вся колебахуся.
На высоту Креста человеческое естество совозвысив, и от ребр Твоих Божественных богатство источил еси спасения, верою покланяющимся Спасе пречистей страсти Твоей.
Благословим Отца, и Сына, и Святаго Духа, Господа.
Троичен: Един Бог убо Троица, ни Отцу изступившу в сыновство, ниже Сыну пременившуся во исхождение: но свойственная и обое, Свет, Бога, три славлю во веки.
Богородичен: Како родила еси рцы, от Отца безлетно предпросиявша, и со Святым Духом воспеваема? Или якоже весть един, благоволивый родитися из Тебе во веки.
Слава Тебе Боже наш, слава Тебе.
Покаяние наше, яко благий естеством прием, вражиих сетей избави Господи, да верою и любовию Твое ныне воспоим святое владычество.
Хвалим, благословим, покланяемся Господеви:
Ирмос: Ангели и небеса на престоле славы седящаго, и яко Бога непрестанно славимаго, благословите, пойте, и превозносите его во веки.
И стихословится Честнейшую:
Песнь 9.
Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес: тем Тя Богородицу ангелов и человек чиноначалия величают.
Се светоносное прииде время, святый день просия, мрачных страстей твоих отбегни, о душе! и зари восприими наставляющия тя к свету, умиление яко вино пиющи веселися, и сластей пиянство возненавиждь.
Яко воистинну блажайшее время пощения Христе, еже дал еси всем верным на побеждение грехов, и очищение спасительное, и дарований приятелище, в немже Тя молим: причастники Спасе, вся ны благих Твоих сотвори.
Обычно милости Твоя на нас изливаяй Щедре богатыя, даждь нам слезы, очищающия скверны и помышления любящих Тя: веру и любовь чистую, богатное покаяние, присвоение совершенное к Тебе единому Многомилостивому.
Всех ангелов божественное множество, и святых лицы достохвальнии, Благаго ныне молите прилежно: яко да божественное поприще сие, пощения настоящее, тещи непреткновенно ны укрепит, и победоносцы соделает.
Богородичен: Благолюбивая Дево, благаго рождшая Спаса, ублажи вся ны, страстьми безмерными, и помышленьми озлобленныя Владычице, и отягченныя грехов бременьми неудобоносными: яко да Тя по долгу, яко Богородицу величаем.
Иный:
Ирмос: Недоумеет всяк:
Недоумеет всякое естество, ангелов и человеков, Твое благоутробие благодарити Благодетелю: яко плотию хотя нас ради обнищал еси, и на Древе о нас распростерлся еси, клятва быв, да первую отымеши клятву человечества.
Светлый день воздержания наста, светлым лицем приидите, усрящим душе моя Владыку, благодати низпослатися свыше нам просяще, и многих прегрешений исправление обрести: яко да страшнейшею геенною не искусимся тамо.
Во тьме грехов содержимым, покаяния ныне священнии входы насташа, всех души просвещающия. Темже душе моя, омрачения уклонися сытости страстей, потщися, да сладости вечныя насладишися тамо.
На Древе руце волею распростер, разстоящаяся вся собрал еси Жизнодавче: копием же Твоя отверзл долготерпеливе ребра, побеждение от ребр прозябшее исправил еси нам. Темже благодаряще поем благоутробие Твое.
Богородичен: Предстательство всех на Тя надеющихся, в бедах бодрая сущи предстательнице Богородице, вечнующия избави нас геенны, и належащих мук горьких: яко да должно поем величия Твоя.
Иный.
Ирмос: Чужде матерем девство:
Язвам покланяемся Твоим Жизнодавче, имиже греха страстей избавльшеся, честным Крестом Твоим познахомся запечатствовани, во спасение и заступление от всякаго прилога вражия.
Озари Креста Твоего сияньми, укрествовавыйся волею за всех спасение, души поющих страсти Твоя Всемилостиве: и на стезю жизнь нашу управи и настави.
Согрешихом преступивше заповеди Твоя, и пути Божественных зачинений Твоих Спасе, уклонихомся далече Человеколюбче, нерадением: но Щедрый, воззови от лести души наша.
Слава, Троичен: Хвала, честь Троице лепотствует, и слава яко единому Господьству, и единому Царству, неслитно, несечно, Единице Божеством покланяемой, несечной бо Естеством, непрестанно величаемей.
Богородичен: Умилостивися молитвами Всечистыя Матере Твоея Всещедре Всецарю славы, егда приидеши судити рабы Твоя, яко милостив: в Тя бо вси веровахом, и Тя Бога знаем.
Слава Тебе Боже наш, слава Тебе.
Светоносный ныне надходящий пост, приемлет трапезу подвигов предложенную, сего ради сея трезвенно вси, честную чашу чистительных слез восприимем вернии: да неисцельными слезами не искусимся тамо.
Катавасиа: Чужде матерем девство, и странно девам деторождение: на Тебе Богородице обоя устроишася. Тем Тя вся племена земная непрестанно величаем.
Светилен Троичный гласа, трижды. И прочее.
На стиховне поем самогласен дне.
Глас 6: Прежде спасительнаго Креста греху царствующу, нечестию державствующу, человеков ублажашеся пища телесная, и о плотских желаниях мали небрежаху: а отнележе Крестное таинство содеяся, и демонское угасе мучительство богоразумием, небесная на земли добродетель жительствует. Темже пост почитается, воздержание сияет, молитва исправляется, и свидетель время настоящее, данное нам от распеншагося Христа Бога, во спасение душ наших.
И глаголем стихи.
Стих: Исполнихомся заутра милости Твоея Господи:
И повторяем самогласен. Таже и мученичен.
Стих: И буди светлость Господа Бога нашего:
Господи, в память святых Твоих, вся тварь празднует, небеса радуются со ангелы, и земля веселится с человеки: тех молитвами помилуй нас.
Слава, и ныне, Крестобогородичен:
Всечистая яко виде Тебе на Кресте повешена, плачущи вопияше матерски: Сыне Мой и Боже Мой, сладчайшее Мое Чадо, како терпиши страсть поносную?
Таже, Благо есть: И Трисвятое. Тропарь: В храме стояще: Господи помилуй, 40.
И глаголется стих от священника: Сый благословен Христос Бог наш, всегда, ныне и присно, и во веки веков, аминь.
Небесный Царю:
И творим три поклоны великия, и глаголем молитву тайно преподобнаго отца нашего Ефрема Сирина: Господи и Владыко живота моего: И прочее. И творим и прочия поклоны.
Совокупляем же и первый час, яко обычно: по обычных же поклонех чтем оглашения преподобнаго отца нашего Феодора Студита. Таже отпуст.
В тойже пяток сырный, поем часы с поклоны, якоже и в среду явлено есть.
На 6-м часе поем тропарь пророчества, глас 8:
Даждь нам помощь от печали Господи, и спаси ны, рождейся от Девы Человеколюбче. Повторяюще тойже.
Прокимен глас 1: Буди Господи милость Твоя на нас, якоже уповахом на Тя. Стих: Радуйтеся праведнии о Господе, правым подобает похвала.
Пророчества Захариина чтение. [Глава 8, ст. 7 – 17.]
Сице глаголет Господь Вседержитель: се Аз спасу люди Моя от земли восточныя, и от земли западныя. И введу их [в землю их,] и вселюся посреде Иерусалима, и будут Ми в люди, и Аз буду им в Бога во истине и в правде. Сице глаголет Господь Вседержитель: да укрепятся руце вас слышащих во днех сих словеса сия от уст пророческих, от негоже дне основася храм Господа Вседержителя, и церковь отнележе создася. Зане прежде дней онех мзда человеком не бе во успех, и мзда скотом не бяше, и исходящему и входящему не бе мира от печали, и послю вся человеки, коегождо на искренняго своего. И ныне не по днем онем прежним Аз сотворю останку людей сих, глаголет Господь Вседержитель. Но покажу мир: виноград даст плод свой, и земля даст жита своя, и небо даст росу свою, и наследити сотворю останкам людей Моих сих вся сия. И будет, яко бесте в клятве во языцех, доме Иудов и доме Израилев, тако спасу вы, и будете в благословении: дерзайте и укрепляйтеся руками вашими. Зане сице глаголет Господь Вседержитель: якоже помыслих озлобити вы, внегда прогневаша Мя отцы ваши, глаголет Господь Вседержитель, и не раскаяхся: Тако уставих, и умыслих во дни сия добро сотворити Иерусалиму, и дому Иудову: дерзайте. Сия словеса, яже сотворите, глаголите истину кийждо искреннему своему, истину и суд мирен судите во вратех ваших. И кийждо злобы искренняго своего не помышляйте в сердцах ваших, и клятвы лживыя не любите: зане вся сия возненавидех, глаголет Господь Вседержитель.
Прокимен, глас 3: Пойте Богу нашему, пойте, пойте Цареви нашему, пойте. Стих: Вси языцы восплещите руками:
И прочее все, якоже в среду сырную указася.
Подобает ведати, яко в субботу и Неделю сырную Минеа не поется, но последование случающихся святых поется, на Повечериях, или егда церквоначальник хощет.
См также:
|
|
