Подобает ведати, аще случится святых триех отроков, и святаго пророка Даниила в Неделю святых праотец: Поется возследование их вкупе с воскресною службою сице.
На Малей вечерни: На Господи воззвах, стихиры воскресны и Богородицы по обычаю.
В субботу вечера, на Малей вечерни,
на Господи воззвах поставим стихов 4: и поем стихиры воскресны Осмогласника 3, повторяюще 1-ю, глас 5:
Стих: От стражи утренния до нощи, от стражи утренния, да уповает Израиль на Господа.
Стих: Яко у Господа милость, и многое у Него избавление, и Той избавит Израиля от всех беззаконий его.
Честным Твоим Крестом Христе, диавола посрамил еси, и Воскресением Твоим жало греховное притупил еси, и спасл еси ны от врат смертных: славим Тя Единородне. [Дважды.]
Стих: Хвалите Господа вси языцы, похвалите Его вси людие.
Воскресение даяй роду человеческому, яко овча на заколение ведеся: устрашишася Сего князи адстии, и взяшася врата плачевная. вниде бо Царь славы Христос, глаголя сущим во узах, изыдите: и сущим во тьме, открыйтеся.
Стих: Яко утвердися милость Его на нас, и истина Господня пребывает во век.
Велие чудо, невидимых Содетель, за человеколюбие плотию пострадав, воскресе Безсмертный, приидите отечествия язык, Тому поклонимся: благоутробием бо Его от прелести избавльшеся, в триех Ипостасех единаго Бога пети навыкохом.
Слава, и ныне, Богородичен: Боголепную и честную Отроковицу почтим, пречестную херувимов: Содетель бо всех вочеловечитися восхотевый, в Тую вселися неизреченно. О странных вещей, и преславных таинств! Кто не удивится о сем внушивый, яко Бог Человек бывает, и преложение в Нем не бе? и девства врата пройде, и умаление в Нем не оставися, якоже пророк глаголет: человек сия не пройдет когда, токмо един Господь Бог Израилев, имеяй велию милость.
Таже, Свете тихий:
Посем прокимен: Господь воцарися: трижды. Стих: Облечеся Господь в силу, и препоясася.
Таже, Сподоби Господи в вечер сей:
Иерей же ектении не глаголет, но поем на стиховне стихиру воскресну, глас 5:
Тебе воплощеннаго Спаса Христа, и небес не разлучившася, во гласех пений величаем: яко Крест и смерть приял еси за род наш, яко Человеколюбец Господь, испровергий адова врата, тридневно воскресл еси, спасая души наша.
Ины стихиры подобны Пресвятей Богородице, глас 5:
Подобен: Радуйся постником:
Стих: Помяну имя Твое во всяком роде и роде.
Руце простираю к Тебе, и сквернеи устне отверзаю к молению, и преклоняю сердечное колено, и умно ногам Твоим пречистым ныне прикасаюся, Чистая: и припадаю к Тебе: болезни моя исцели, летныя моя многия и неисцельныя благостию Твоею исцели струпы. Избави от видимых врагов и невидимых: облегчи Отроковице, тяготу лености моея, яко да Тя пою и славлю, Еюже обрете мир велию милость.
Стих: Слыши Дщи и виждь, и приклони ухо Твое.
Радуйся Сына Божия несказанно заченшая Всенепорочная, и Сего рождшая, плоть по нам воистинну от кровей Твоих приимшаго, душу умную же и самовластную имущаго: неоскудно бо во Адама облекшагося, милости ради и благости неизреченныя. Отонудуже во двою естеству нам возвещается, обоих показуяй в Себе действо Христос: Егоже моли душам нашим дати велию милость.
Стих: Лицу Твоему помолятся богатии людстии.
Радуйся доброто Иаковля, Юже избра Бог, Юже возлюби, двере спасаемых, пламеноносная клеще, клятвы разрешение, Всеблагословенная: чрево Боговместимое, падших возведение: святейшая херувимов, и тварей преимущая: неудобозримое видение, слышание новейшее, неизреченное глаголание, колеснице Слова: облаче, из негоже возсия Солнце, и мене озаряя, и сущим во тьме подая велию милость.
Слава, и ныне, Богородичен: Яже о Тебе пророчествия, исполнишася Дево Чистая: ов убо от пророк дверь Тя прорече, во Едеме на восток зрящую, юже никтоже пройде, точию Зиждитель Твой, и всего мира: ов же купину огнем жегому, яко в Тебе обита огнь Божества, и неопалима пребысть. Ин гору святую, от неяже отсечеся камень краеугольный, кроме руки человеческия, и порази образ мысленнаго Навуходоносора: воистинну велие и преславное, еже в Тебе таинство есть Богомати. Темже Тя славим: Тобою бо бысть спасение душам нашим.
Таже, Ныне отпущаеши: Трисвятое. И по Отче наш:
Тропарь, глас 5:
Собезначальное Слово Отцу и Духови, от Девы рождшееся на спасение наше, воспоим вернии и поклонимся: яко благоволи плотию взыти на Крест, и смерть претерпети, и воскресити умершия славным Воскресением Своим.
Богородичен: Радуйся двере Господня непроходимая: радуйся стено и покрове притекающих к Тебе. Радуйся, необуреваемое пристанище, и Неискусобрачная, рождшая плотию Творца Твоего и Бога: молящи не оскудевай о воспевающих, и кланяющихся Рождеству Твоему.
Ектениа. И отпуст.
На Велицей вечерни
На Господи воззвах, стихиры воскресны 3, глас 5:
Стих: Изведи из темницы душу мою, исповедатися имени Твоему.
Честным Твоим Крестом Христе, диавола посрамил еси, и Воскресением Твоим жало греховное притупил еси, и спасл еси ны от врат смертных: славим Тя Единородне.
Стих: Мене ждут праведницы, дондеже воздаси мне.
Воскресение даяй роду человеческому, яко овча на заколение ведеся: устрашишася Сего князи адстии, и взяшася врата плачевная. вниде бо Царь славы Христос, глаголя сущим во узах, изыдите: и сущим во тьме, открыйтеся.
Стих: Из глубины воззвах к Тебе Господи, Господи, услыши глас мой.
Велие чудо, невидимых Содетель, за человеколюбие плотию пострадав, воскресе Безсмертный, приидите отечествия язык, Тому поклонимся: благоутробием бо Его от прелести избавльшеся, в триех Ипостасех единаго Бога пети навыкохом.
И праотцев 3, глас 8.
Подобен: Иже во Едеме:
Стих: Да будут уши Твои, внемлюще гласу моления моего.
Праотцев днесь вернии, совершающе память, воспоим Христа избавителя, возвеличившаго их во всех языцех, и чудес преславная верно совершившаго Господа, яко державна и сильна, и от них показавша жезл силы нам, едину неискусомужную, и Богоотроковицу Марию чистую: из Неяже цвет пройде Христос, израстивый всем жизнь, и неиждиваемую пищу, и спасение вечное.
Стих: Аще беззакония назриши Господи, Господи, кто постоит? Яко у Тебе очищение есть.
Иже святыя отроки из огня избавивый, Владыко, и от уст львовых Даниила, благословивый Авраама, и Исаака раба Твоего, и сего сына Иакова, благоволивый от семене их быти по нам, да прежде поползнувшияся спасеши праотцы наша Крестом Твоим и Воскресением, и расторгнув смертныя узы, совозставиши вся, яже от века сущия в мертвых, покланяющияся Тебе, Христе Царю веков.
Стих: Имене ради Твоего, потерпех Тя Господи, потерпе душа моя в слово Твое, упова душа моя на Господа.
Якоже в хладе посреде пламене росою Духа, радующеся отроцы Божии хождаху, таинственно в нем прообразивше Троицу, и воплощение Христово, и яко мудрии верою угасиша силу огненную. И Даниил же праведный львов явися обуздатель. ихже молитвами умолен быв, Человеколюбче Спасе, и нас негасимаго и вечнаго избави огня, и сподоби ны Царствия Твоего, Господи.
И пророка Даниила 2, глас 4.
Подобен: Яко добля:
Стих: От стражи утренния до нощи, от стражи утренния, да уповает Израиль на Господа.
Даниил чудный, сердце стяжав чисто Духа жилище и от Него просвещаемый, будущих явление прорицает явственно: пророчества светлостию удобряемый и ясно сказуяй державных пребеззаконных царей сокровенная сония.
Стих: Яко у Господа милость, и многое у Него избавление, и Той избавит Израиля от всех беззаконий его.
Предукрепив тело твое постом неослабным, львов уста заткнул еси: посреде бо их стоя, пророче чудный, и к Богу Благому взирая, пребыл еси не уязвен несказанною силою вся действующаго преславно, Избавителя душ наших.
И отроков 2, глас тойже.
Подобен: Дал еси знамение:
Стих: Хвалите Господа вси языцы, похвалите Его вси людие.
Законов держащеся богоданных, всеблаженнии, мерзостными не осквернистеся пищами, но, нетленну душевную доброту сохранше, соблюдосте плоти невредный и неувядаемый цвет чудный и красную лепоту Владыце, прославляющу Своя угодники.
Стих: Яко утвердися милость Его на нас, и истина Господня пребывает во век.
Божественным распалаеми юноши пламенем огнь преобидеша, в немже орошаеми, честнии, лик пресветел вообразивше, песнь многопетую, видешася, поюще: ибо непреемное Даниил Царствие Христово видев, радовашеся, яко пророк всеизряднейший.
Слава, праотцев, глас 6:
[Анатолиа:] Иже прежде закона отцы вся восхвалим днесь вернии, Авраама боголюбиваго, и Исаака от обещания рожденнаго, и Иакова, и дванадесять патриархи, Давида кротчайшаго, и Даниила желаний пророка, и три отроки с ними славяще, пещь в росу преложившия, просяще оставления от Христа Бога, прославляемаго во святых Своих.
И ныне, Богородичен 1-й, гласа, глас 5:
В Чермнем мори, неискусобрачныя Невесты образ написася иногда: тамо Моисей, разделитель воды: зде же Гавриил, служитель чудесе. Тогда глубину шествова немокренно Израиль: ныне же Христа роди безсеменно Дева. Море по прошествии Израилеве, пребысть непроходно: Непорочная по рождестве Еммануилеве, пребысть нетленна. Сый, и прежде Сый, явлейся яко Человек, Боже помилуй нас.
Вход. Прокимен дне.
На литии: Стихира храма:
И пророка Даниила, глас 4: писана на Господи воззвах, на ряду последняя.
Подобен: Яко добля:
На Престоле седящаго и ангелы обстоимаго, непостижнаго видел еси Судию, суща Праведнаго, пророче чудный. Удивль же ся ужасному и страшному видению, назнаменал еси сущим потом всем, написав Второе пришествие воплощшагося Бога нашего.
И отроков, глас тойже: писана на Господи же воззвах, последняя.
Подобен: Дал еси знамение:
Словеси премудрости твоея удивльшеся мучители, Данииле досточудне, и отроков разуму, Халдейскою страною начальствовати и владети вас поставиша, честнии: добродетели бо весть явственнейше чудитися и супостат, и жития светлости, страсти бо удержавше, властели бысте.
Глас 2. Анатолиево:
Духовно нас, вернии, собра днесь пророк Даниил и трапезу предложи добродетелей обильно богатым и нищим, и странным, и домашним, и чашу умну, проливающу воду благочестия, и веселящу сердца верных, и Духа Святаго благодать подающу. Сей бо пророк — светлейший светильник, просиявый в мире, служения вся Ассирийская низложи и зверей неукротимых уста загради. С сим и трие отроцы да восхвалятся, не злати естеством суще, и злата искусншии показавшеся: не слия бо их огнь пещный, но сохрани целы, ихже нафта, и смола, и рождие венчаша. Приведый же нас на обхождение лета Господь да сподобит ны достигнути и в Господский и честный день Рождества Христова, подающаго нам тех молитвами очищение грехов и велию милость.
Слава, праотцев, глас 1:
Лучами облиставшеся богоглаголания, великоименитии пророцы присно блажатся, и речения Духа плодствующе, несказанное рождество Христа Бога всем проповедаша, законно же кончину совершиша, поживше жизнь пречудную.
И ныне, Богородичен, глас тойже:
Се исполнися Исаиино проречение, Дева бо родила еси, и по рождестве яко прежде рождества пребыла еси: Бог бо бе рождейся, темже и естества новопресече {естество новопременися}. Но о Богомати, моления Твоих рабов, в Твоем храме приносимая Тебе не презри: но яко Благоутробнаго Твоима рукама носящи, на Твоя рабы умилосердися, и моли спастися душам нашим.
На стиховне стихиры воскресны, глас 5:
Тебе воплощеннаго Спаса Христа, и небес не разлучившася, во гласех пений величаем: яко Крест и смерть приял еси за род наш, яко Человеколюбец Господь, испровергий адова врата, тридневно воскресл еси, спасая души наша.
Ины стихиры по алфавиту.
Стих: Господь воцарися, в лепоту облечеся.
Прободеным Твоим ребром Жизнодавче, токи оставления всем источил еси, жизни и спасения: плотию же смерть восприял еси, безсмертие нам даруя: вселив же ся во гроб нас свободил еси, совоскресив с Собою славно яко Бог. Сего ради вопием: Человеколюбче Господи, слава Тебе.
Стих: Ибо утверди вселенную, яже не подвижится.
Странно Твое распятие, и еже во ад сошествие Человеколюбче есть: пленив бо его, и древния юзники совоскресив с Собою славно яко Бог, рай отверз, восприяти сего сподобил еси. Темже и нам славящим Твое тридневное востание, даруй очищение грехов: рая жители сподобляя, яко един Благоутробен.
Стих: Дому Твоему подобает святыня Господи, в долготу дний.
Нас ради плотию страсть приимый, и тридневен из мертвых воскресый, плотския наша страсти исцели, и возстави от прегрешений лютых Человеколюбче, и спаси нас.
Слава, праотцев, глас 3:
[Германово:] Праотцев собор, празднолюбцы приидите, псаломски да восхвалим: Адама праотца, Еноха, Ноя, Мелхиседека, Авраама, Исаака, и Иакова: по законе Моисеа и Аарона: Иисуса, Самуила, и Давида: с нимиже Исаию, Иеремию, и Иезекииля, и Даниила, и дванадесять, купно Илию, Елиссеа и вся: Захарию, и Крестителя, и проповедавшия Христа, жизнь и воскресение рода нашего.
И ныне, пророка, глас 6:
Даниил, муж желаний, камень, без руки отсечен, видев Тя, Господи, Младенца, без семене рождена, пронарече Тя, из Девы воплощенна Слова, непременнаго Бога и Спаса душ наших.
На благословении хлебов, тропарь. Богородице Дево: дважды: И праотцев, единожды.
Глас 2:
Верою праотцы оправдал еси, от язык теми предобручивый Церковь, хвалятся в славе святии, яко от семене их есть плод благославен, без семене Рождшая Тя. Тех молитвами, Христе Боже, помилуй нас.
И Буди имя Господне: трижды. псалом 33: Благословлю Господа: И чтение в посланиих апостольских.
А идеже бдение не бывает, на Повечерии по Достойне и по Трисвятом, кондак святых праотцев.
