Благовещение в Среду Великой седмицы: Вечерня и Литургия


Благовещение Пресвятой Богородицы

Главная Праздники Благовещение

Вечерня и Повечерие УтреняВечерня и Литургия

При часе же 3-м дне творим исхождение вне монастыря, и возвращшеся поем часы с кафисмами: и чтется Тетроевангелие. Глаголем на часех тропарь праздника: и чтение праздника: кондаки глаголем дне, и праздника, пременяюще. И на конец коегождо часа 3 поклоны великия, и час 9-й без кафисмы. Блаженны скоро, без пения: и Помяни нас Господи: и прочее. По Отче наш, кондак дне: Слава, и ныне, праздника: Господи помилуй, 40. Слава, и ныне: Честнейшую: и поклоны 3 великия: и молитва, Всесвятая Троице:

И абие глаголем: Приидите поклонимся: трижды: и поем Вечерню без кафисмы, и без поклонов. На Господи воззвах, стихиры самогласны дне 5, глас 6:

Погруженная грехом, обрете Тя пристанище спасения, виждь и мира со слезами растворяющую, Тебе вопияше: виждь согрешающих покаяния ожидаяй. Но Владыко спаси мя от волны греховныя, великия ради Твоея милости.

Днесь Христос приходит в дом фарисеов, и жена грешница приступивши к ногам, валяшеся вопиющи: виждь погруженную грехом, отчаянную деяний ради, негнушаемую от Твоея благости: и даждь ми Господи оставление злых, и спаси мя.

Простре блудница власы Тебе Владыце, простре Иуда руце беззаконным: ова убо прияти оставление, ов же взяти сребреники. Темже Тебе вопием проданому и свобождшему нас: Господи слава Тебе.

Приступи жена злосмрадная и оскверненая, слезы проливающи, любящи Спасе, страсть исповедающи: како воззрю к Тебе Владыце? Сам бо пришел еси спасти блудницу: из глубины умершую мя воскреси, иже Лазаря воздвигнувый из гроба четверодневна: приими мя окаянную Господи, и спаси мя.

Отчаянная жития ради, и уведомая нрава ради, мира носящая приступи Тебе вопиющи: да не отвержеши мене блудную, Родивыйся от Девы: да не презриши моя слезы радосте ангелов. Но приими мя кающуюся, юже не отринул еси согрешающую Господи, великия ради Твоея милости.

В шестый месяц послан бысть архангел к Деве Чистей, и радоватися Eй прирек, благовести из Нея Избавителю проити. Темже приимши целование, зачат Тя Превечнаго Бога, несказанно благоволившаго вочеловечитися, во спасение душ наших. [Дважды.]

Языка, eгоже не ведяше, услыша Богородица, глаголаше бо к ней архангел благовещения глаголы: отoнудуже верно приимши целование, зачат Тя превечнаго Бога. Темже и мы радующеся вопием Ти: из Нея воплотивыйся непреложно, Боже, мир мирови даруй, и душам нашим велию милость. [Дважды.]

Се воззвание ныне явися нам: паче слова Бог человеком соединяется, архангеловым гласом прелестъ отгоняется: Дева бо приемлет радость, земная быша небо, мир разрешися первыя клятвы. Да радуется тварь, и гласы да воспоет: Творче и Избавителю наш, Господи слава Тебе.

Господи, яже во многия грехи впадшая жена, Твое ощутившая Божество, мироносицы вземши чин, рыдающи миро Тебе прежде погребения приносит: увы мне глаголющи! яко нощь мне есть разжжение блуда невоздержанна, мрачное же и безлунное рачение греха. Приими моя источники слез, иже облаками производяй моря воду. Приклонися к моим воздыханием сердечным, приклонивый небеса неизреченным Твоим истощанием: да облобыжу пречистеи Твои нозе, и отру сия паки главы моея власы, ихже в раи Ева, по полудни, шумом уши огласивши, страхом скрыся. Грехов моих множества, и судеб Твоих бездны кто изследит? Душеспасче Спасе мой, да мя Твою рабу не презриши, иже безмерную имеяй милость.

[Иоанна монаха:] Послан бысть с небесе Гавриил архангел, благовестити Деве зачатие: и пришед в Назарет, помышляше в себе, чудеси удивляяся: о како в вышних непостижим Сый от Девы раждается! Имеяй престол небо, и подножие землю, во утробу вмещается Девичу! На Негоже шестокрилатии, и многоoчитии зрети не могут, словом eдинем от Сея воплотитися благоизволи. Божие eсть слово настоящее. Что убо стою, и не глаголю Деве: радуйся Благодатная, Господь с Тобою: радуйся, Чистая Дево, радуйся, Невесто Неневестная: радуйся, Мати Живота, благословен Плод чрева Твоего.

Иерей же творит проскомидию в стихиры.

Вход со Евангелием. Свете тихий: Прокимен, и чтения дне.

Прокимен, псалом 135, глас 4: Исповедайтеся Богу Небесному, яко благ, яко в век милость Его. Стих: Исповедайтеся Богу богов, яко в век милость Его.

Бысть во дни многия оны, велик быв Моисей, изыде к братиям своим сыном Израилевым: разумев же болезнь их, виде человека египтянина биюща некоего евреанина от братии его сынов Израилевых. Обозревся же семо и овамо, никогоже виде: и поразив египтянина, скры его в песце. Изшед же во вторый день, виде два мужа евреанина биющияся, и глагола обидящему: чесо ради ты биеши искренняго? Он же рече: кто тя постави князя и судию над нами? Еда убити мя ты хощеши, имже образом убил еси вчера египтянина? Убояся же Моисей, и рече: аще сице явлен бысть глагол сей? Услыша же фараон глагол сей, и искаше убити Моисеа. Отыде же Моисей от лица фараонова, и вселися в земли Мадиамстей: пришед же в землю Мадиамскую, седе при кладязе. Священнику же Мадиамскому беша седмь дщерей пасущих овцы отца своего Иофора: пришедше же черпаху, дондеже наполниша корыта, напоити овцы отца своего Иофора. Пришедше же пастырие изгнаша я: востав же Моисей избави их, и налия им, и напои овцы их. Приидоша же к Рагуилу отцу своему, он же рече им: что яко ускористе приити днесь? Оныя же рекоша: человек египтянин избави нас от пастырей, и начерпа нам, и напои овцы наша. Он же рече дщерем своим: и где есть? И вскую сице остависте человека? Призовите убо его, да яст хлеб. Вселися же Моисей у человека: и даде Сепфору дщерь свою Моисею в жену. Во чреве же заченши жена, роди сына, и нарече Моисей имя ему, Гирсам, глаголя: яко пришлец есмь в земли чуждей. Еще же заченши роди сына втораго, и нарече имя ему Елиезер, глаголя: Бог бо отца моего Помощник мой, и избави мя из руки фараоновы.

Прокимен, псалом 137, глас 4: Господи, милость Твоя во век, дел руку Твоею не презри. Стих: Исповемся Тебе Господи всем сердцем моим, и пред ангелы воспою Тебе.

Бысть яко день сей, и приидоша ангели Божии предстати пред Господем: и диавол прииде посреде их предстати пред Господем. И рече Господь диаволу: откуду ты грядеши? Тогда рече диавол пред Господем: прошед поднебесную, и обшед всю землю, приидох. И рече Господь к диаволу: внял ли еси убо [мыслию твоею] рабу моему Иову? Яко несть такова от сущих на земли: человек незлобив, истинен, непорочен, Богочестив, удаляяйся от всякаго зла, еще же придержится незлобия: ты же рекл еси имения его погубити вотще. Отвещав же диавол Господеви, рече: кожу за кожу, и вся елика имать человек, даст за душу свою. Обаче посли руку Твою, и коснися костем его, и плоти его, аще не в лице Тя благословит. Рече же Господь диаволу: се предаю ти его, токмо душу его соблюди. Изыде же диавол от лица Господня, и порази Иова гноем лютым от ног даже до главы. И взя [Иов] чреп, да острогает гной свой, и той седяше на гноищи вне града. Времени же многу минувшу, рече к нему жена его глаголющи: доколе терпиши, се пожду время еще мало, чающи надежди спасения моего. Се бо потребися от земли память твоя, сынове твои и дщери, моего чрева болезни и труды, имиже вотще трудихся с болезньми: ты же сам в гнои червей седиши, обнощевая вне без покрова, и аз скитающися и служащи, место от места преходящи, и дом от дому, ожидающи солнца, когда зайдет, да почию от трудов моих, и от болезней, яже мя ныне обдержат. Но рцы глагол некий ко Господу, и умри. Он же воззрев рече к ней: вскую яко едина от безумных жен возглаголала еси? Аще благая прияхом от руки Господни, злых ли не стерпим? Во всех сих приключившихся ему, ничимже согреши Иов устнама пред Богом, [и не даде безумия Богу].

Вниде Моисей в гору Божию Хорив: явися же ему ангел Господень в пламени огненне из купины, и виде, яко купина горяше огнем, и купина не сгараше. Рече же Моисей: прешед узрю видение великое сие, что яко не сгарает купина? Якоже виде Господь, яко приступает видети, призва его Господь, из купины глаголя: Моисее, Моисее. он же рече: что есть? И рече: не приближися семо. иззуй сапог от ногу твоею: место бо, на немже ты стоиши, земля свята есть. И рече ему: Аз есмь Бог отца твоего, Бог Авраамов, и Бог Исааков, и Бог Иаковль. отврати же Моисей лице свое, стыдяше бо ся зрети пред Богом. Рече же Господь к Моисею: видя видех озлобление людей Моих, иже во Египте, и вопль их услышах от насильствующих в делех. Вем бо болезнь их, и снидох еже изъяти их от руки египтян, и извести их от земли оныя, и ввести их в землю благу и многу, в землю точащу мед и млеко.

Господь созда мя начало путей Своих, в дела Своя: Прежде век основа мя в начале, прежде неже землю сотворити, и прежде неже бездны соделати, прежде неже произыти источником водным: Прежде неже горам водрузитися, прежде же всех холмов раждает мя. Господь сотвори страны и пустыни, и концы населены под небесем. Егда готовяше небо, с Ним бех: и егда отлучаше Себе престол на ветрех. Егда крепки творяше вышния облаки, и яко тверды полагаше источники поднебесныя: Внегда полагати морю предел его, и воды не мимоидут уст его, и крепки творяше основания земли, бех к Нему подобна. Аз бех, о нейже радовашеся, по вся же дни веселяхся пред лицем Его, на всяко время.

Ектениа малая, и возглас Трисвятаго: Яко Свят еси Боже наш: Прокимен, Апостол, и Аллилуиа праздника. Евангелие праздника, и дне.

Прокимен, глас 4: Благовестите день от дне спасение Бога нашего. Стих: Воспойте Господеви песнь нову, воспойте Господеви вся земля.

Братие, святяй и освящаемии, от Eдинаго вси: eяже ради вины не стыдится братию нарицати их, глаголя:	Братья, освящающий и освящаемые, все — от Единого; поэтому Он не стыдится называть их братиями, говоря:
Возвещу имя Твое братии Моей, посреде церкве воспою Тя.	Возвещу имя Твое братиям Моим, посреди церкви воспою Тебя.
И паки: Аз буду надеяся Нань. И паки: се Аз и дети, яже Ми дал eсть Бог.	И еще: Я буду уповать на Него. И еще: вот Я и дети, которых дал Мне Бог.
Понеже убо дети приобщишася плоти и крови, и Той приискренне приобщися техже, да смертию упразднит имущаго державу смерти, сиречь, диавола:	А как дети причастны плоти и крови, то и Он также воспринял оные, дабы смертью лишить силы имеющего державу смерти, то есть диавола,
и избавит сих, eлицы страхом смерти чрез все житие повинни беша работе.	и избавить тех, которые от страха смерти через всю жизнь были подвержены рабству.
Не от ангел убо когда {воистинну} приемлет, но от семене Авраамова приемлет:	Ибо не ангелов восприемлет Он, но восприемлет семя Авраамово.
отнюдуже должен бе по всему подобитися братии, да милостив будет и верен первосвященник в тех, яже к Богу, во eже очистити грехи людския.	Посему Он должен был во всем уподобиться братиям, чтобы быть милостивым и верным первосвященником пред Богом, для умилостивления за грехи народа.
В немже бо пострада Сам искушен быв, может и искушаeмым помощи.	Ибо, как Сам Он претерпел, быв искушен, то может и искушаемым помочь.

Аллилуиа, глас 1: Снидет яко дождь на руно, и яко капля каплющая на землю. Стих: Будет имя Его благословено во веки, прежде солнца пребывает имя Его.

Во днех онех, зачат Eлисавет жена Захариина, и таяшеся месяц пять, глаголющи:	В те дни зачала Елисавета, жена Захарии, и таилась пять месяцев и говорила:
яко тако мне сотвори Господь во дни, в няже призре отъяти поношение мое в человецех.	так сотворил мне Господь во дни сии, в которые призрел на меня, чтобы снять с меня поношение между людьми.
В месяц же шестый послан бысть ангел Гавриил от Бога во град Галилейский, eмуже имя Назарет,	В шестой же месяц послан был ангел Гавриил от Бога в город Галилейский, называемый Назарет,
к Деве обрученней мужеви, eмуже имя Иосиф, от дому Давидова: и имя Деве, Мариам.	к Деве, обрученной мужу, именем Иосифу, из дома Давидова; имя же Деве: Мария.
И вшед к Ней ангел, рече: радуйся Благодатная, Господь с Тобою: благословена Ты в женах.	Ангел, войдя к Ней, сказал: радуйся, Благодатная! Господь с Тобою; благословенна Ты между женами.
Oна же видевши смутися о словеси eго, и помышляше, каково будет целование сие.	Она же, увидев его, смутилась от слов его и размышляла, что бы это было за приветствие.
И рече ангел Eй: не бойся Мариам, обрете бо благодать от Бога.	И сказал Ей ангел: не бойся, Мария, ибо Ты обрела благодать у Бога;
И се зачнеши во чреве, и родиши Сына, и наречеши имя Eму Иисус.	и вот, зачнешь во чреве, и родишь Сына, и наречешь Ему имя: Иисус.
Сей будет велий, и Сын Вышняго наречется: и даст Eму Господь Бог престол Давида oтца Eго:	Он будет велик и наречется Сыном Всевышнего, и даст Ему Господь Бог престол Давида, отца Его;
и воцарится в дому Иаковли во веки, и Царствию Eго не будет конца.	и будет царствовать над домом Иакова во веки, и Царству Его не будет конца.
Рече же Мариам ко ангелу: како будет сие, идеже мужа не знаю?	Мария же сказала ангелу: как будет это, когда Я мужа не знаю?
И отвещав ангел, рече Eй: Дух Святый найдет на Тя, и сила Вышняго осенит Тя: темже и раждаемое Свято, наречется Сын Божий.	Ангел сказал Ей в ответ: Дух Святый найдет на Тебя, и сила Всевышнего осенит Тебя; посему и рождаемое Святое наречется Сыном Божиим.
И се Eлисавет, южика Твоя, и та зачат сына в старости своей: и сей месяц шестый eсть eй, нарицаемей неплоды.	Вот и Елисавета, родственница Твоя, называемая неплодною, и она зачала сына в старости своей, и ей уже шестой месяц,
Яко не изнеможет от Бога всяк глагол.	ибо у Бога не останется бессильным никакое слово.
Рече же Мариам: се Раба Господня, буди Мне по глаголу твоему. И отыде от Нея ангел.	Тогда Мария сказала: се, Раба Господня; да будет Мне по слову твоему. И отошел от Нее ангел.

Во время оно, Иисусу бывшу в Вифании, в дому Симона прокаженнаго, приступи к Нему жена, сткляницу мира имущи многоценнаго, и возливаше на главу Его, возлежащу. Видевше же ученицы Его, негодоваша, глаголюще: чесо ради гибель сия бысть? Можаше бо сие миро продано быти на мнозе, и датися нищим. Разумев же Иисус рече им: что труждаете жену? дело бо добро содела о Мне. Всегда бо нищия имате со собою, Мене же не всегда имате. Возлиявши бо сия миро сие на тело Мое, на погребение Мя сотвори. Аминь глаголю вам: идеже аще проповедано будет Евангелие сие во всем мире, речется, и еже сотвори сия, в память ея. Тогда шед един от обоюнадесяте, глаголемый Иуда Искариотский, ко архиереом, рече: что ми хощете дати, и аз вам предам Его? Они же поставиша ему тридесять сребреник. И оттоле искаше подобна времене, да Его предаст.

Во время оно, когда Иисус был в Вифании, в доме Симона прокаженного, приступила к Нему женщина с алавастровым сосудом мира драгоценного и возливала Ему возлежащему на голову. Увидев это, ученики Его вознегодовали и говорили: к чему такая трата? Ибо можно было бы продать это миро за большую цену и дать нищим. Но Иисус, уразумев сие, сказал им: что смущаете женщину? она доброе дело сделала для Меня: ибо нищих всегда имеете с собою, а Меня не всегда имеете; возлив миро сие на тело Мое, она приготовила Меня к погребению; истинно говорю вам: где ни будет проповедано Евангелие сие в целом мире, сказано будет в память ее и о том, что она сделала. Тогда один из двенадцати, называемый Иуда Искариот, пошел к первосвященникам и сказал: что вы дадите мне, и я вам предам Его? Они предложили ему тридцать сребреников; и с того времени он искал удобного случая предать Его.

И прочая Литургиа Златоустаго.

Вместо Достойно, поем ирмос: Яко одушевленному:

Причастен праздника: Избра Господь Сиона, и изволи его в жилище Себе.

На трапезе разрешаем на елей и вино точию.

В конец же часов бывает прощение, по обычаю: Повечерие же поем малое без поклонов, и трипеснец кир Андреа Критскаго.

На Господи воззвах, стихиры на 10: и поем дне, 5, и праздника, 5. Слава дне, глас 8: Господи, яже во многия грехи впадшая жена: И ныне, праздника. Вход со Евангелием. Свете тихий: Прокимен, и чтения дне: и праздника два. Таже прокимен, Апостол, Аллилуиа, и Евангелие праздника, и дне. Сподоби Господи: ектениа, Исполним вечернюю: На стиховне дне, с припевы дневными. Слава, дне, И ныне, праздника. Ныне отпущаеши: тропарь праздника, ектении, и отпуст.

Вечерня и Повечерие УтреняВечерня и Литургия

Благовещение Пресвятой Богородицы