Благовещение Пресвятой Богородицы

Аще случится Благовещение Пресвятыя Богородицы в Среду Великую

На Утрени,

на Бог Господь, тропарь праздника трижды, глас 4:

Днесь спасения нашего главизна, и еже от века таинства явление: Сын Божий Сын Девы бывает, и Гавриил благодать благовествует, темже и мы с ним Богородице возопиим: Радуйся, Благодатная, Господь с Тобою.

И стихословие. По 1 стихословии седален, глас 3.
Подобен: Красоте девства:

Блудница приступи к Тебе, миро со слезами изливающи на нозе Твои Человеколюбче, и смрада зол избавляется повелением твоим! Дыша же благодать Твою ученик неблагодарный, сию отлагает, и смрадом одевается, сребролюбием продая Тебе. Слава Христе благоутробию Твоему.

Слава, и ныне, тойже.

По 2-м стихословии седален, глас 4.
Подобен: Удивися Иосиф:

Иуда льстец, сребролюбия рачительствуяй, предати Тя Господи, сокровище живота, лестно поучашеся, отонудуже и упився, течет ко иудеом, глаголет беззаконым: что ми хощете дати, и аз вам предам, во еже распяти Его?

Слава, и ныне, тойже.

И чтение дне.

По 3-й кафисме ектениа, и седальны праздника оба, глас 1-й.
Подобен: Гроб Твой:

Великий воевода невещественных Ангел, во град Назарет представ, Царя возвещает Тебе, Пречистая, веков и Господа, Радуйся, глаголя Тебе, благословенная Марие. Непостижимое и несказанное чудо, человеков обновление.

Слава, и ныне, глас 3.
Подобен: Красоте девства:

Днесь вся тварь радуется, яко еже радуйся, Тебе глаголет архангел, Благословенная, Честная и Пречистая Мати Христа Бога. Днесь омрачается змиино шатание: клятвы бо праотчи разрешается соуз. Темже и непрестанно вопием Ти: радуйся, обрадованная.

И чтение праздника.

Полиелей, и седален, глас 4.
Подобен: Удивися Иосиф:

Гавриил с Небесе, еже радуйся, зовет Честней, яко зачнет во чреве Превечнаго Бога, словом концы составльшаго. Темже Мариам отвещаваше: безмужна есмь и как рожду Сына: безсеменное рождение кто виде? И сказуя глаголаше ангел Богородице и Деве: найдет на Тя Дух Святый и сила Вышняго осенит Тя.

Слава, и ныне, глас и подобен тойже:

Послан бысть Гавриил к Деве Марии, и возвести Ей неизглаголанную радость, яко безсеменно зачнет и не истлевает. Родиши бо Сына, Превечнаго Бога, и спасет люди Своя от грех их: и свидетельствует Пославый мя вопити Тебе благословенная, еже радуйся: Дева родиши, и по рождестве паки пребудеши Дева.

И чтение праздника.

Степенна, 1-й антифон 4-го гласа, ихже стихи повторяюще поем:

От юности моея мнози борют мя страсти, но Сам мя заступи, и спаси Спасе мой.

Ненавидящии Сиона, посрамитеся от Господа, яко трава бо огнем будете изсохше.

Слава: Святым Духом всяка душа живится, и чистотою возвышается, светлеется Троическим единством священнотайне.

И ныне, тойже.

Прокимен, глас 4: Благовестите день от дне спасение Бога нашего. Стих: Воспойте Господеви песнь нову, воспойте Господеви, вся земля.

Всякое дыхание:

Евангелие от Луки, зачало 4. [Лк. 1, 39—49, 56.]

Псалом 50. По 50-м псалме стихира праздника, глас 2. Самогласна:

Благовествует Гавриил Благодатней днесь: радуйся, Неневестная Мати, и Неискусобрачная. Не удивляйся странному моему зраку, ни ужасайся, архангел бо eсмь. Змий прельсти Eву иногда: ныне же благовествую Тебе радость, и пребудеши нетленна, и родиши Господа, Пречистая.

Канон праздника, со ирмосом на 14. Катавасиа праздника, ирмос оба лика вкупе.

[зри] А идеже трипеснец, поем канон праздника со ирмосом на 6: и трипеснец на 8. Катавасиа, ирмос Триоди.

Канон Благовещения, творение кир Феофана, егоже краегранесие по алфавиту, до 8-й песни. Глас 4.

Песнь 1.

Ирмос: Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Да поет Тебе, Владычице, движа свирель духовную, Давид праотец Твой: послушай Дщи радованнаго гласа от ангела, радость бо возвещает Тебе неизглаголанную.

Ангел возопи: Вопию Тебе, веселяся, приклони ухо Твое, и вонми ми, Божие возвещающу безсеменное зачатие, обрела бо еси благодать пред Богом, еяже никогдаже обрете другая, Всечистая.

Богородица рече: Да разумею, ангеле, твоих глагол силу, како будет, еже рекл еси? Глаголи явственнейше. Како зачну Дева сущи Отроковица? Како же и Мати буду Зиждителя Моего?

Ангел возопи: Лестно мя вещати помышляеши, яко мню, и радуюся, зря Твое утверждение. Дерзай, Владычице, Богу бо хотящу, удобь скончаются и преславная.

Катавасиа: Отверзу уста моя:

Песнь 3.

Ирмос: Твоя песнословцы, Богородице, живый и независтный источниче, лик себе совокупльшия духовно утверди, в Божественней Твоей славе, венцев славы сподоби.

Богородица рече: Оскуде князь от Иуды, время наста прочее, в неже явится языков надежда, Христос. Ты же, како Сего рожду Дева сущи, скажи?

Ангел возопи: Ищеши от мене уведети Дево, образ зачатия Твоего, но той несказанен есть, Дух же Святый зиждительною силою осенив Тя совершит.

Богородица рече: Моя прамати приемши разум змиин, пищи Божественныя изгнана бысть, темже и Аз боюся целования страннаго твоего, стыдящися поползновения.

Ангел возопи: Божий предстатель послан есмь, Божественный поведати Тебе совет. Что мене боишися, Всенепорочная, паче Тебе боящагося? Что благоговееши мне, Владычице, Тебе честно благоговеющему?

И трипеснец, творение господина Космы, егоже краестрочие: Тетради псало. Сиесть: В Среду воспою. Глас 2.

{Τ} Ирмос: На камени мя веры утвердив, разширил еси уста моя на враги моя, возвесели бо ся дух мой внегда пети: несть свят, якоже Бог наш, и несть праведен, паче Тебе Господи.

{Ε} Во тщетных соборище беззаконных, и мыслию собирается злонравною, осуждена Избавителя изрещи Тя Христе. Емуже поем: Ты еси Бог наш, и несть свят паче Тебе Господи.

{Τ} Лютый совет беззаконных, притворяется богоборныя души сущий, яко злопотребна праведнаго убити Христа. Емуже поем: Ты еси Бог наш, и несть свят паче Тебе Господи.

Катавасиа: На камени мя веры утвердив:

Кондак дне, глас 4.
Подобен: Вознесыйся:

Паче блудницы Блаже, беззаконновав, слез тучи никакоже Тебе принесох: но молчанием моляся припадаю Ти, любовию облобызая пречистеи Твои нозе, яко да оставление мне яко Владыка подаси долгов, зовущу Ти Спасе: от скверных дел моих избави мя.

Икос: Яже первее блудница жена, внезапу целомудренна явися, возненавидевши дела студнаго греха, и сладости телесныя, поминающи студ многий и суд мучения, егоже претерпят блудницы и сквернии, от нихже первый есмь аз, и боюся: но пребываю в злом обычаи безумный. Блудная же жена убоявшися, и потщавшися скоро прииде, вопиющи ко Избавителю: Человеколюбче и Щедре, от скверных дел моих избави мя.

Седален праздника, глас 8.
Подобен: Свирелей пастырских:

Слово Божие на землю ныне сниде, ангел предста, вопия Деве: радуйся, Благословенная, Яже печатию едина сохраншися, во утробе приемши Предвечнаго Слова и Господа, да от прелести спасет, яко Бог, род человеческий.

Слава, и ныне, глас тойже:
Подобен: Повеленное:

Послан бысть с небесе архистратиг Гавриил от Бога, скоро предста ко одушевленному граду, глаголя к Ней явственно: Зиждителя приимеши, Дево, во утробе, и родиши Сего непреложне с плотию. Темже послан есмь возвестити Тебе странное рождество Чистая, и стою зовя Тебе: радуйся, Невесто Неневестная.

И чтение праздника.

Песнь 4.

Ирмос: Седяй в славе, на Престоле Божества, на облаце легце, прииде Иисус Пребожественый, нетленною дланию и спасе зовущия: слава, Христе, силе Твоей.

Богородица рече: Священную некую Деву раждающую, слышах пророка, древле Еммануила прорекша. Хощу же разумети, како Божества растворение, естество человеческое претерпит?

Ангел возопи: Явила есть купина, неопальна пребывши, приемши пламень, обрадованная Всепетая, на Тебе таинства преславное: по рождестве бо пребудеши Чистая Приснодева.

Богородица рече: Освещаемь сиянием Бога Вседержителя, истины проповедниче, глаголи Гаврииле истиннейшая: како нетленне бывши чистоте Моей, Слова рожду, с плотию Безплотнаго?

Ангел возопи: Со страхом Тебе, яко раб Госпоже предстою, с боязнию Отроковице, ныне смотрити стыждуся Тебе. Яко бо дождь на руно снидет на Тя Слово Отчее, яко благоволи.

Катавасиа: Седяй в славе:

Песнь 5.

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Богородица рече: Разумети не могу твоих словес известия: чудеса бо быша множицею, Божественною силою чудодействуема, знамения и образы законнии, роди же дева неискусомужне никогдаже.

Ангел возопи: Дивит Всенепорочная, и странно бо чудо Твое, Едина бо Ты всех Царя приимеши во утробе воплощаема, и Тя прообразуют пророческая речения, гадания и законнии образы.

Богородица рече: Всеми Невместимый, и всеми Невидимый, како Сей может во чреве Девиче вселитися, еже Сам созда? Како же и зачну Бога Слова, собезначальна Отцу и Духу?

Ангел возопи: К Твоему праотцу Давиду обещався посадити от плода Твоего чрева, на престоле царства его. Иаковлю Тя доброту, едину избра в словесное селение.

Катавасиа: Ужасошася всяческая:

Песнь 6.

Ирмос: Возопи прообразуя погребение тридневное, пророк Иона в ките Богу моляся: от тли избави мя, Иисусе, Царю сил.

Богородица рече: Глагол твоих, Гаврииле, глас радованен приемши, веселия Божественнаго исполнихся: радость бо поведаеши и веселие возвещаеши безконечное.

Ангел возопи: Тебе дадеся радость, Богомати Божественная, Тебе, еже радуйся, вся тварь вопиет, Богоневесто: Ты бо едина Мати Сына Божия пронаречеся Чистая.

Богородица рече: Евы Мною ныне да упразднится осуждение, да воздастся Мною долг днесь, Мною заимствование древнее да дастся преисполнено.

Ангел возопи: Обещася Бог Аврааму праотцу, благословити в семене его языком, Чистая, Тобою же конец обещание приемлет днесь.

Катавасиа: Возопи прообразуя:

Кондак праздника, глас 8.

Взбранной Воеводе победительная, яко избавльшеся от злых, благодарственная восписуем Ти раби Твои, Богородице; но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Икос: Ангел предстатель с небесе послан бысть рещи Богородице: радуйся, и со безплотным гласом воплощаема Тя зря, Господи, ужасашеся и стояше, зовый к Ней таковая: Радуйся, Еюже радость возсияет: радуйся, Еюже клятва исчезнет. Радуйся, падшаго Адама воззвание: радуйся, слез Евиных избавление. Радуйся, высото неудобовосходимая человеческими помыслы: радуйся, глубино неудобозримая и ангельскима очима. Радуйся, яко еси Царево седалище: радуйся, яко носиши Носящаго вся. Радуйся, звездо, являющая Солнце: радуйся, утробо Божественнаго воплощения. Радуйся, Еюже обновляется тварь: радуйся, Еюже покланяемся Творцу. Радуйся, Невесто Неневестная.

И чтем Пролог.

Песнь 7.

Ирмос: Не послужиша твари богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Богородица рече: Свет невещественный поведая, в вещественне телеси совокупляемь, за милосердие многое, светлое Благовещение, Божественная проповедания, ныне взываеши Ми: благословен, Всечистая, Плод Твоего чрева.

Ангел возопи: Радуйся, Владычице Дево, радуйся Пречистая, радуйся, приятелище Божие, радуйся свещниче Света, Адамово воззвание, Евы избавление, горо святая, преявственное священие и чертог безсмертия.

Богородица рече: Душу очисти, и тело освяти, Церковь сотвори Мя вместительну Бога, скинию Богоукрашену, одушевлен храм наитием Пресвятаго Духа, и Жизни Чистую Матерь.

Ангел возопи: Яко многосветлую свещу, и Богоделанен чертог, вижу Тя ныне яко злат кивот, закона Подателя приими, Богоневесто, благоизволившаго человеческое избавити Тобою тленное существо.

Катавасиа: Не послужиша твари:

Песнь 8.

Ирмос: Слыши Отроковице Дево Чистая, да речет убо Гавриил, совет Вышняго древний истинный: буди к приятию готова Божию, Тобою бо Невместимый с человеки поживе, тем и радуяся вопию: благословите вся дела Господня Господа.

Богородица рече: Ум всяк побеждается земных, отвеща Девица, ищущи, яже ми вещаеши, преславная: слышах твоя словеса, но боюся, ужасающися, да не лестию Мя, яко Еву, далече послеши от Бога, но обаче се вопию: благословите вся дела Господня Господа, и превозносите Его во веки.

Ангел возопи: Се Тебе недоуменное разрешится, глаголет к сим Гавриил, добре бо рекла еси, вещь неудобопостижна. Словесем Твоих устен повинующися прочее, не сумнися яко льсти, якоже вещи веруй. Аз бо радуяся вопию: благословите вся дела Господня Господа, и превозносите Его во веки.

Богородица рече: Закон сей от Бога есть человеком, Непорочная абие глаголет, от общия любве рождество происходит. Не вем супружника сласти всеконечно, како убо глаголеши, яко рожду? Боюся, еда лесть глаголеши. Но обаче се вопию: благословите вся дела Господня Господа, и превозносите Его во веки.

Ангел возопи: Глаголы, яже мне вещаеши, Чистая, ангел паки глаголет, обычая есть рождества человеков смертных. Истинно Бога Тебе обещаваю, паче слова же и смысла воплощаема, яко весть, из Тебе. Темже и радуяся вопию: благословите вся дела Господня Господа, и превозносите Его во веки.

Богородица рече: Являешимися Мне истины вещатель, рече Дева, радости бо общия пришел еси благовестник. Душу убо очистих с телом, и по глаголу твоему буди Мне, да вселится Бог в Мя, к Немуже вопию с тобою: благословите вся дела Господня Господа, и превозносите Его во веки.

Иный.

{Ρ} Ирмос: Глагол мучителев понеже превозможе, седмерицею пещь разжженна бысть иногда: в нейже отроцы не опалишася, царево поправше веление, но вопияху: вся дела Господня Господа пойте, и превозносите во вся веки.

{Α} Изливающи жена миро честное, Владычню и Божественному страшному верху Христе, следов Твоих пречистых прикоснуся, оскверненыма дланьма, и вопияше: вся дела Господня Господа пойте, и превозносите во вся веки.

{Δ} Слезами омывает нозе, повинная грехом, Создавшаго, и отирает власы своими. Темже в житии содеянных не погреши избавления, но вопияше: вся дела Господня Господа пойте, и превозносите во вся веки.

{Ι} Священнодействуется избавление благонравней, от спасительных утроб же и слез источника, в немже исповеданием измывшися, не стыдяшеся, но вопияше: вся дела Господня Господа пойте, и превозносите во вся веки.

Таже, Хвалим, благословим:

И паки ирмос: Глагол мучителев:

На 9-й песни, Честнейшую не поем, но поем припев праздника: Благовествуй земле радость велию, хвалите небеса Божию славу. Таже ирмос праздника, Яко одушевленному: К тропарем же трипеснца, припев: Слава Тебе Боже наш, слава Тебе.

Песнь 9.

Ирмос: Яко одушевленному Божию кивоту, да никакоже коснется рука скверных. Устне же верных, Богородице, немолчно, глас ангела воспевающе, с радостию да вопиют: радуйся Благодатная, Господь с Тобою.

Паче смысла заченши Бога, естества обычая утаися, Отроковице, Ты бо в рождестве матерскаго избежала еси тленнаго естества и превышши сущи. Темже достойно слышиши: радуйся Благодатная Господь с Тобою.

Како точиши млеко, Дево Чистая? Не может изрещи язык землен. Странну бо естества показуеши вещь, законнаго рождества устав преходиши. Темже достойно слышиши: радуйся Благодатная, Господь с Тобою.

Тайно во святых писаниих глаголася о Тебе, Мати Вышняго: лествицу бо древле Иаков Тя образующую видев, рече: степень Божия сия. Темже достойно слышиши: радуйся Благодатная, Господь с Тобою.

Чудное священноявленному Моисею, купина и огнь показа чудо, ищай же конца в прехождении времен, во Отроковице Чистей рече, узрю. Ейже яко Богородице да речется: радуйся, Благодатная, Господь с Тобою.

Даниил Тя гору нарече мысленную, Родительницу же Божию Исаия, видит же яко руно Гедеон, Давид же священие глаголет, дверь же Тя ин. Гавриил же Ти взывает: радуйся, Благодатная, Господь с Тобою.

Иный.

{Ψ} Ирмос: Душами чистыми, и нескверными устнами, приидите возвеличим Нескверную, и Пречистую Матерь Еммануилеву, Еюже из Нея к Рожденному приносяще молитву: пощади души наша Христе Боже, и спаси нас.

{Α} Неразумен явлься, и лукав ревнообразник, дар достойнобожествен словом продает. Имже долг разрешися грехов, крадый лютый Иуда любобожественную благодать: пощади души наша Христе Боже, и спаси нас.

{Λ} Глаголет шед беззаконным князем: что ми хощете дати, и аз Христа вам искомаго хотящим предам? Присвоение Христово Иуда отринувый златом: пощади души наша Христе Боже, и спаси нас.

{Ω} О слепотнаго сребролюбия нечестиве, отонудуже забвение получил еси, яко души никакоже равностоятелен мир, якоже научился еси: отчаянием бо сам себе удавил еси вжегся предателю: пощади души наша Христе Боже, и спаси нас.

Таже поем ирмос Триоди, Душами чистыми: потом припев праздника, и ирмос: Яко одушевленному:

Светилен праздника.
Подобен: Со ученики:

Ангельских сил архистратиг послан бысть от Бога Вседержителя к Чистей и Деве, благовестити странное и неизреченное чудо. Зане Бог, яко человек, из Нея младодействуется без семене, назидаяй весь человеческий род: людие, благовестите обновление мира.

Слава, дне:

Чертог Твой вижду Спасе мой украшенный, и одежды не имам, да вниду вонь, просвети одеяние души моея Светодавче, и спаси мя.

И ныне, праздника:
Подобен: Жены услышите:

Еже от века днесь познавается таинство Божие, Бог Слово, Сын Девы Марии, за милосердие бывает, и радость Благовещения Гавриил просвещавает. С нимже возопием Ей: радуйся, Мати Господня.

На хвалитех стихиры праздника, на 4: глас 1.
Подобен: Небесных чинов:

С небесных кругов слетев Гавриил в Назарет, прииде к Деве Марии, вопия Eй: радуйся, зачнеши Сына, Адама древнейшаго Творца веков и Избавителя вопиющих Тебе: радуйся, Чистая.

Соприсносущное Слово пребезначальнаго Oтца, не разлучився горних, ныне предста дольним, ради крайняго благоутробия, милость прием, eже на ны поползновения и Адамову нищету восприем, вообразися в чуждее.

Гавриил Деве благовестие с небесе принес, вопияше: радуйся, зачнеши во чреве Твоем Тобою вместимаго, невместимаго же всеми: и рождающая явишися, от Oтца прежде денницы Возсиявшаго.

Пресущественное Слово, плотию вселився в Тя, Отчим советом, Богородице Дево, назда род иже по нам, падший от древния клятвы. Тем еже радуйся Тебе вси, Мати Христова, со ангелом вопием верно.

Слава, дне, глас 6, самогласна:

Днесь Христос приходит в дом фарисеов, и жена грешница приступивши к ногам, валяшеся вопиющи: виждь погруженную грехом, отчаянную деяний ради, негнушаемую от Твоея благости: и даждь ми Господи оставление злых, и спаси мя.

И ныне, праздника, глас 2, самогласен:

[Феофаново:] Еже от века таинство открывается днесь, и Сын Божий, Сын Человечь бывает: да хуждшее восприем, подаст ми лучшее, солгася древле Адам, и бог возжелев быти не бысть: Человек бывает Бог, да бога Адама соделает. Да веселится тварь, да ликовствует естество, яко архангел Деве со страхом предстоит, и еже радуйся приносит, печали сопротивное: за милосердие милости вочеловечивыйся, Боже наш, слава Тебе.

На стиховне дне, с припевы их, яко предписася в Великий Понедельник.

Глас 1:

Тебе Девыя Сына, блудница познавши Бога, глаголаше, в плачи молящися, яко слез достойная соделавшая: разреши долг, якоже и аз власы: возлюби любящую, праведно ненавидимую, и близ мытарей Тебе проповем, Благодетелю Человеколюбче.

Стих: Исполнихомся заутра милости Твоея Господи, и возрадовахомся, и возвеселихомся.

Многоценное миро, блудница смеси со слезами, и излия на пречистеи нозе Твои, облобызающи: оную абие оправдал еси, нам же прощение даруй Пострадавый о нас, и спаси нас.

Стих: Во вся дни наша возвеселихомся, за дни в няже смирил ны еси, лета в няже видехом злая.

Егда грешная приношаше миро, тогда ученик соглашашеся пребеззаконным. Овая убо радовашеся, истощающи миро многоценное: сей же тщашеся продати Безценнаго. Сия Владыку познаваше, а сей от Владыки разлучашеся. Сия свобождашеся, а Иуда раб бываше врагу. Люто есть леность, велие покаяние: еже мне даруй Спасе, пострадавый о нас, и спаси нас.

Стих: И призри на рабы Твоя, и на дела Твоя, и настави сыны их.

О Иудина окаянства! Зряше блудницу целующую стопы, и умышляше лестию предания целование. Оная власы разреши, а сей яростию вязашеся, нося вместо мира злосмрадную злобу: зависть бо не весть предпочитати полезное. О Иудина окаянства! От негоже избави Боже, души наша.

Глас 2:

Стих: И буди светлость Господа Бога нашего на нас, и дела рук наших исправи на нас, и дело рук наших исправи.

Грешная тече к миру, купити многоценное миро, еже помазати Благодетеля, и миропродателю вопияше: Даждь ми миро, да помажу и аз Очистившаго вся моя грехи.

Слава, праздника, глас 8:

Да веселятся небеса, и радуется земля: ибо Oтцу соприсносущный, собезначальный и сопрестольный, щедростию прием и человеколюбную милость, Себе постави во истощание, благоволением и советом Oтчим и во утробу вселися Девичу, предочищенную Духом. О чудесе! Бог в человецех, Невместимый в ложеснах, Безлетный в лето: и eже преславнее, яко и зачатие безсеменно, и истощание несказанно, и таинство eлико. Бог бо истощавается, и воплощается, и зиждется, ангелу к Чистей зачатие глаголавшу: радуйся Обрадованная, Господь с Тобою, имеяй велию милость.

И ныне, самогласен дне, глас тойже:
Творение Кассианы инокини.

Господи, яже во многия грехи впадшая жена, Твое ощутившая Божество, мироносицы вземши чин, рыдающи миро Тебе прежде погребения приносит: увы мне глаголющи! яко нощь мне есть разжжение блуда невоздержанна, мрачное же и безлунное рачение греха. Приими моя источники слез, иже облаками производяй моря воду. Приклонися к моим воздыханием сердечным, приклонивый небеса неизреченным Твоим истощанием: да облобыжу пречистеи Твои нозе, и отру сия паки главы моея власы, ихже в раи Ева, по полудни, шумом уши огласивши, страхом скрыся. Грехов моих множества, и судеб Твоих бездны кто изследит? Душеспасче Спасе мой, да мя Твою рабу не презриши, иже безмерную имеяй милость.

Таже, Благо есть исповедатися: единожды. По Трисвятом, тропарь праздника, ектениа, и поклоны 3 великия. Посем, Приидите поклонимся, трижды: и час 1-й. Тропарь праздника. И ныне, Богородичен: Что Тя наречем: По Трисвятом кондак праздника, и в конец 3 поклоны великия. Таже, Христе Свете истинный: и отпуст.